පිල් මාරුවක්! අදත් ඇමතිකම්වල දිවුරන්න පිරිසක් සූදානම් – පොහොට්ටුවේ පොරයක්

2022 මැයි 23, පෙ.ව. 4:08

---

---

කැබිනට් මණ්ඩලයේ ඇමතිවරුන් තවත් දස දෙනෙකු පමණ ජනාධිපති ගෝඨාභය රාජපක්ෂ මහතා ඉදිරියේ අද (23) දිවුරුම් දීමට නියමිත බව වාර්තා වනවා.

ශ්‍රී ලංකා නිදහස් පක්ෂයෙන් ආණ්ඩුවට එක්වන මහින්ද අමරවීර, ඊපීඩීපී නායක ඩග්ලස් දේවානන්ද, ලංකා කම්කරු කොංග්‍රසයේ ජීවන් තොණ්ඩමන් යන මහත්වරුන් ද, මීට පෙර කැබිනට් මණ්ඩලයේ සිටි පොදුජන පෙරමුණේ ඇමැතිවරුන් කිහිපදෙනකුද අද දිවුරුම් දෙන ඇමතිවරුන් පිරිසට ඇතුළත් වනු ඇතැයි දැනගන්නට තිබෙනවා.

අනුරගෙන් ඉඟියක්

ජාතික ජන බලවේගයේ නායක අනුර කුමාර දිසානායක මහතාද මේ සම්බන්ධයෙන් අදහස් පළකරමින් සඳහන් කළේ අද දිනයේ ශ්‍රී ලංකා නිදහස් පක්ෂය නියෝජනය කරන තවත් මන්ත්‍රීවරු පිරිසක් අමාත්‍යධුරවල දිවුරුම් දෙනු ඇති බවයි.

“අගමැතිවරයා පත්කරලා සතියකින් විතර ඇමතිවරු 4 දෙනෙක් පත්කරනවා. ආයේ සතියක් ගිහිල්ලා 9දෙනෙක් පත්කරනවා. මට ආරංචි විදිහට සඳුදා තව කිහිපදෙනෙක් පත්කරනවා. මොකක්ද මේ කරන්නේ. ඇමදාන්නේ. එනවනම් ඉක්මනින් එන්න කියලා කියන්නේ. මේ පරණ පුරුදු සෙල්ලමනේ. මොකද කළේ සජිත්ගේ පක්ෂයෙන් දෙන්නෙක් ගත්තා. තව තියෙනවා. තව යයිද දන්නේ නැහැ. ශ්‍රී ලංකා නිදහස් පක්ෂයේ මෛත්‍රීපාල සිරිසේන මහත්තයා පක්ෂයක් ලෙස ලිපියක් දීලා කිව්වා අපි සහාය දෙන්නම් කියලා. ඒත් හොරෙන් ගන්නවා. ඊයේ නිමල් සිරිපාල සඳුදා මහින්ද අමරවීර මම දන්න විදිහට.. තව ඕනේනම් ලසන්නත, දුමින්ද දිසානායක, චාමර සම්පත් බලන්නකෝ වෙන්නේ මොකක්ද කියලා.” යැයි ඒ මහතා සඳහන් කළා.

ඇමති පට්ටම්වලට පොහොට්ටුවේ පොරයක්

මේ අතර නව අමාත්‍ය මණ්ඩලයේ ඇමතිධුර ලබාගැනීම සඳහා ශ්‍රී ලංකා පොදුජන පෙරමුණේ මන්ත්‍රීවරුන් අතර දැඩි සටනක් ආරම්භ වී තිබෙන බවද වාර්තා වනවා.

එම පිරිස ජනාධිපතිවරයාත් අගමැතිවරයාත් වරින් වර මුණගැසී හා විවිධ පාර්ශ්ව හරහා මෙම ඉල්ලීම් ඉදිරිපත් කර ඇතැයි දැනගන්නට තිබෙනවා.

අමාත්‍ය මණ්ඩලය ජනාධිපතිවරයා සහ අගමැතිවරයා ද ඇතුළුව 25 දෙනකුට පමණ සීමා කිරීමට තීරණය කර ඇතැයි වාර්තා වන අතර ඇමතිවරුන් 23 දෙනාගෙන් 13දෙනකු දැනටමත් දිවුරුම් දී තිබෙනවා.

සජබයට ශ්‍රීලනිපයට තවත් ඇමති ධූර

ඇමති මණ්ඩලයේ ඇමතිවරුන් සංඛ්‍යාවෙන් 10 දෙනකු පමණ ශ්‍රී ලංකා පොදුජන පෙරමුණට හිමිවන අතර, ඉන් පස්දෙනකු මේ වන විටත් දිවුරුම්දී අවසන්.

තවත් ඇමතිධූර පහක් පමණ පොදුජන පෙරමුණට වෙන්කර ඇති අතර, ඒ සඳහා මන්ත්‍රීවරුන් 40 දෙනකු පමණ ඉල්ලීම් ඉදිරිපත් කර ඇතැයි වාර්තා වනවා.

අමාත්‍ය මණ්ඩලයේ දිනේෂ් ගුණවර්ධන සහ ඊ පී ඩී පී නායක ඩග්ලස් දේවානන්ද යන මහත්වරුන්ට අමතරව, කැබිනට් අමාත්‍යධුර එකොළහක් සෙසු පක්ෂවලට හිමිවීමට නියමිතයි.

ඉන් සෙසු පක්ෂ හා කණ්ඩායම් නියෝජනය කරන නිමල් සිරිපාල ද සිල්වා, ආචාර්ය සුසිල් ප්‍රේම ජයන්ත, ආචාර්ය විජයදාස රාජපක්ෂ, හරීන් ප්‍රනාන්දු, මනුෂ නානයක්කාර, නලින් ප්‍රනාන්දු සහ ටිරාන් අලස් යන මහත්වරුන් ඇමතිධුරවල දැනටමත් දිවුරුම්දී අවසන්.

ශ්‍රී ලංකා නිදහස් පක්ෂයට හා සමගි ජන බලවේගය ට තවත් ඇමති ධූරයක් බැගින් වෙන් කර ඇතැයිද දැනගන්නට තිබෙනවා.

ජනාධිපතිවරයා, අගමැතිවරයා හැරුණුවිට කැබිනට් මණ්ඩලයේ ඇමැතිවරුන් නව දෙනකු මේ වන විට දිවුරුම් දී ඇති අතර, අද දිවුරුම් දෙන දස දෙනාද සමඟ ඇමති මණ්ඩලය 25 දෙනකු ට පමණ සීමා වනු ඇත.

---